"El periodista Juan Vega participa nunes xornaes facistes." (Güei, num.23, 2ª quincena de marzu 2000).

El periodista asturianu Juan Vega, colaborador de dellos periódicos asturianos y presentador d'un programa en Tele Oviedo, participó esti branu nel "Programa de la Universidad de Verano" del grupo facista "Democracia Nacional".

Juan Vega tuvo la so intervención el 2 d'Agostu d'esti añu en Granada con una conferencia que llevaba por títulu "La Nación Española: La República". El periodista, que militó antañu nel Movimientu Comunista, defendió "la unidá nacional española nun Estáu fuerte afitáu sobre principios políticos republicanos como garantía d'esa unidá". Vega atalanta que "el réxime políticu d'anguañu nun ye suficiente pa que siga España como nación fuerte, soberana y independiente, y onde la so unidá nacional tea afitada, mientres que la República sí lo ye. Non como seguidora de la bandera tricolor, sinon como réxime nacional español, como realización práutica, como factor pa l'articulación d'España como nación".
Les idees filofacistes de Juan Vega yeren perconocíes al traviés de los sos artículos d'opinión na prensa asturiana. Nellos criticaba de contino tolos conflictos y lluches sociales de calter rupturista y tresformador. La insumisión, la llucha de los trabayadores de Duro, el movimientu de recuperación llingüísticu, yeren atacaos dende la so tribuna periodística con una verborrea facista y españolista.
Lo que nun yera sabío ye la so relación con grupos facistes organizaos como Democracia Nacional, y la so participación en actividaes de la militancia de los mesmos.
Cabe agora entrugase quienes son realmente los que crean opinión na prensa oficial y a qu'intereses ocultos respuenden. Qué opción política representen de verdá y de qu'idees tan falando cuando critiquen, falseen y criminalicen a seutores sociales al marxe de los comportamientos marcaos pol sistema de coses imperante.
Nesti sentíu Juan Vega ta consideráu ente los profesionales del periodismu como una opinión "respetable" y "acreditada".
Dende 'l Güei tamos seguros que Vega nun ye l'unicu de los periodistas asturianos que tienen relaciones polítiques col facismu más estremista.
Les opiniones que dende les tribunes de los 3 medios de comunicación escritos n'Asturies amuesen munches veces la catadura moral y política reaccionaria y fascistoide. Esto ensin contar los casos nos que dende la Delegación del Gobiernu díctense les noticies.