La comunidá autónoma asturiana siempres sofrió una situación de marxinación llingüística, asina ye como nun ye estrañu que’l númberu de grupos qu’escoyieron l’asturianu como llingua vehicular seya menor que nes comunidaes plurillingües vecines.

Aún asina yá nos años 70 entamaron a surdir grupos de rock carauterizaos por cantar en llingua asturiana, formaciones que diben medrando col pasu les décades pesie a la inestabilidá de munches d’elles.

Anguaño n’Asturies esiste una escena de rock n’asturiano que, si bien nun ye mui bayurosa, cunta con dellos grupos afitaos y con reconocimientu del públicu d'Asturies. Nesta xornada participarán dalgunos de los vieyos y nuevos protagonistes d’esti rock fecho n’asturiano.


> Mesa reonda: “1976-2009: 33 años de rock n’asturiano”

Intervienen:

Xune Elipe (Villalegre-Avilés, 1962)
Foi pioneru nel usu de la llingua asturiana na radio con dellos programes n'estremaes emisores y cadenes del país, siendo anguañu'l responsable del espaciu Rockmería na RPA. Fundador y director del sellu discográficu L'Aguañaz foi tamién autor del llibru "Llingua y Rock". Ye vocalista del grupu Dixebra dende la so creación, amás de miembru del proyectu Soncai System y director del Anuariu de la Música Asturiana.

Miguel Fernandi “Burilo” (Lluanco, 1979)
Componente de Skama la Rede, grupu de la nueva xeneración de rock n’asturianu y miembru del coleutivu Músicos Pola Oficialidá. Llocutor radiofónicu.

Dolfo Camilo Díaz (Caborana, 1963)
En 1979 funda Guaxa, el primer grupu heavy en llingua asturiana pa dempués crear nel 1983 Güextia, un apueste pel rock n’asturiano entemecío cola canción d´autor. Pasando a fines de los 80 pel grupu EX – tamién de rock n’ast-, anguañu forma parte del dúu Nenyuri y ye compositor pa delles bandes asturianes. Ye tamién home de lliteratura, con creaciones lliteraries espublizaes y musicales representaos.

Modera:

Roberto Colunga
Fundador del sellu Xunca Records nos años 90 col qu'entamó dellos conciertos y movió a grupos musicales asturianos. La so xera como músicu desendolcola al traviés de la so militancia n'Eskándalo Públiko, grupu xixonés punkrock d'entamos de los 90.

> 21.00: Conciertu Rock n’asturiano: Falanoncaduca + Misiva

Falanoncaduca
Falanoncaduca naz nel branu del 2007 al traviés de la xuntanza de dellos músicos –toos ellos orixinarios d’otres formaciones - de La Pola L.lena, Uviéu y Xixón.Cola llingua asturiana como mou d’expresión desendolquen un soníu de base ska, aunque amestáu a otros xeneros musicales –rock, reggae, folk, metal, rap…-, que da orixen musical a lo qu’ellos mesmos definen como “Mecigayu Son”.

Apostando por una orixinal y folixera puesta n’escena recorrieron gran parte de la xeografía asturiana, formando parte del cartelu de destacaos conciertos y compartiendo escenariu con importantes bandes de dientru y fuera d’Asturies.

Más información:
www.myspace.com/falanoncaduca


Misiva
Misiva ye una banda moscona que naz en 2007 tres la desapaición del grupu del que formaben parte los cuatro componentes, Bobby Réncor. Ya nes últimes dómines d’aquella banda entamaron les idees de lo que llueu diba ser MISIVA. Asturianu y castellán como llingües d’espresión y punk rock como estilu.

Misiva, cola so música intenta dignificar la llingua asturiana a la vez que pretende facer reflexonar sobre temas que-ys esmolecen. “Oficialidá, Activismu y Conciencia” ye’l lema d’estos moscones que vienen d’asoleyar el so primer discu autoeditáu y col que ganaron el concursu de maquetes del CISLAN y el de Llanera Suena 09. Un nuevu aire punk rock pa la música n’asturianu.

Más información:
www.myspace.com/misivapunkrock

La mesa reonda va ser nel Centru Social Sestaferia (cai Joaquín Alonso Bunet, Xixón) con entrada llibre.

El conciertu va ser na Rockpública (paséu Sanllorienzu, Xixón con un preciu d’entrada llibre y voluntariu; caún qu’aporte lo que-y pete.