Metanes la escandalera d’alloriantes anuncies alrodiu d’una pantasma apellidada “carrera profesional de los emplegaos públicos”, vien más qu’a cuentu’l falar d’un aspeutu bien real d’esa “carrera”, nun nada respetuosu colos principios constitucionales de méritu y capacidá, imparcialidá y oxetividá, polos que debiere rexise l’Alministración Pública: el xorrecimientu descomanáu de los nomamientos a deu -que ye lo mesmo que dicir por mor de la confianza o a petite del poder políticu- na Alministración Pública del Principáu d’Asturies.
Na llexisllatura acabante d’entamar, el gobiernu de la Comunidá Autónoma aprobó yá más de 160 puestos de trabayu de Xefatura de Serviciu o asemeyaos, de nomamientu “dixital” o a cuenta del enfotu políticu nos agraciaos colos puestinos. Esti sistema d’ocupación de places funcionariales faise incumpliendo dafechu la llegalidá vixente y en rebeldía escontra la xurisprudencia afitada del Tribunal Supremu que vien interpretando n’abondes sentencies (ocho como poco nos dos caberos años) que la denomada llibre designación o nomamientu a deu ye un procedimientu estraordinariu, esceición a la regla xeneral del concursu de méritos y del que namás pue tirase llexítimamente pa dellos y cuntaos puestos direutivos d’especial responsabilidá, tres la xustificación afayadiza, puestu a puestu y casu a casu, nun tando constitucionalmente permitío’l so emplegu xeneralizáu pa una determinada categoría como ye la de Xefatura de Serviciu.
Nun conforme cola iregularidá d’emplegar en tolos casos el maleducáu vezu d’apuntar col deu pal nomamientu de les Xefatures de Serviciu, el gobiernu del Principáu ta pel llabor d’incorporalu a una categoría que se-y acaba d’ocurrir baxo la denominación xenérica de “Coordinadores”, puestinos de trabayu asitiaos xerárquicamente embaxo y a les ordes de los Xefes de Serviciu, teniendo ya creaos más de 30 abellugadorios con esi nome o paecíu, a ocupar por xente escoyío pel deu y pa desendolcar asuntos talos que la xestión de los contratos alministrativos, la execución de les obres públiques o les xefatures de personal, llabores qu’asina pasen a ser de confianza política.
Nesti revoltiamientu, güei yá nadie plasma por ver a funcionarios de les caberes promociones, con malapenes ún o dos años d’esperiencia profesional, ocupando puestos de Xefatura de Serviciu, upaos de sópitu al picalín de la carrera alministrativa pola mor del máxicu deón del políticu que-yos tien ciñu o enfotu; nin de que tolos puestos d’Interventores, dende’l Xeneral a los Delegaos, puestos de trabayu de los que depende el perimportante llabor del control económicu-alministrativu, seyan desendolcaos por persones de la confianza del poder políticu; tampoco de que tomen a risión la obligación llegal de facer pública convocatoria endenantes d’ocupar los puestos de llibre designación o nomamientu a deu -magar nun seya más que por guardar les apariencies- siendo práutica corriente y xeneralizada que’l funcionariu escoyíu aposiénte nel despachín primero que se convoque la vacante; o del abusu “ad nauseam” de les comisiones de serviciu muncho más allá del tiempu que la llei consiente.
Dementres esti réxime d’avasallemientu políticu del funcionariáu enrraigona y viña na Alministración del Principáu, les mayoríes sindicales y los medios d’opinión al serviciu del poder, afánense n’escondelu tres la gran fumarada que tan faciendo cola yerba moyao d’una “carrera profesional nueva y moderna”, de la qu’habrá tiempu pa falar en cuantes que mos pase la irritadura güeyos que per aciu d’entrambos los dos, deu y fumeru, carecemos.
Roblen: Xabiel Álvarez Villa, DNI 32.870.210-J; Silvino Cordero Pando, DNI 10.566.154-T; Xurde Blanco Puente, DNI 10.528.464-F; y Jorge Diego Sánchez, DNI 10.557.258-M. Titulaos Superiores de l’Administración del Principáu