27F. República Árabe Sarahaui Democrática n’Uviéu

26 de febreru de 2013 DE 2013 • Glayiu

Mañana miércoles 27 cúmplense treinta y siete años desque el Frente Polisariu proclamara unillateralmente la República Árabe Saharaui Democrática, contrapuesta al ocupante marroquí, y sofitada pola Arxelia de Ben Bella. L’últimu episodiu d’estes más de tres décades de conflictu fue’l xuiciu y conderga de venticuatro activistes saharauis por un tribunal militar de Marruecos.

Depués d’esti tiempu, la situación nel Sáhara Occidental sigue enconada, col tiempu corriendo a favor de Marruecos. Cada añu que pasa el reinu alauita tien a un mayor númberu de colonos habitando nel territoriu saharaui, esperando a tener la mayoría de la población pa desendolcar un referéndum d’autodetermín, histórica y eterna demanda de la principal fuerza política saharaui, el Frente Polisariu.
Con motivo de la celebración del aniversario de la proclamación de la República Árabe Saharaui Democrática, delles organizaciones internacionalistes y de solidaridá cola causa saharaui van cellebrar unes xornaes na plaza de Trascorrales, n’Uviéu, los díes 27 y 28 de febreru y 1 de marzu. Nelles van debatir sobre la situación actual nel Sáhara Occidental, el procesu xudicial del Tribunal militar de Rabat contra 24 activistes saharauis del Campamentu de la Llibertá, y averarán la cultura saharaui a la sociedá asturiana, a traviés de la llectura de poemes y los alcuentros que tendrán llugar na haima llantada en dicha plaza.

La CSI esixe acciones al Miniesteriu d’Asuntos Esteriores pa la lliberación de los presos políticos saharauis

El sindicatu asturianu Corriente Sindical d’Izquierda asoleyó güei un comunicáu nel que venceya la solución del problema saharaui al papel que pueda xugar l’Estáu español en dichu conflictu. Diz la Corriente que "según el Derechu Internacional y la Organización Nacional de les Naciones Xuníes (ONX) l’Estáu español sigue siendo la potencia alministradora del Sahara Occidental, hasta que se complete’l procesu de descolonización. Basándonos nel IV conveniu de Xinebra, relativu a la protección debida a les persones civiles en tiempu de guerra, de 1949, ratificáu per Marruecos y que ye un elementu esencial del Derechu Humanitariu, establécense delles condiciones pa poder someter a civiles d’un país ocupáu a la xusticia militar del país ocupante.
De primeres, tien de destacase que los procesaos teníen de tar deteníos nel so país, el Sahara Occidental. Sicasí, tuvieron deteníos nel territoriu del país ocupante, Marruecos y tuvieron internaos na cárcel de Salé (Marruecos) onde fueron oxetu de violaciones de los sos drechos.
De segundes, los procesaos tienen de ser xulgaos nel so propiu país, el Sahara Occidental, y por un tribunal non políticu. Sicasí, tán siendo xulgaos en Marruecos, fora del so país, y por un tribunal que la so composición foi determinada pol poder políticu.
De terceres, Marruecos nun dexó que los deteníos puedan tar asesoraos por un sustitutu de la potencia protectora, tal que previen l’artículu 11, en relación col artículu 9, dambos del IV Conveniu de Xinebra.
En cuartu llugar, los procesaos nun cuntaron coles debíes garantíes por falta de pruebes. Les armes coles que supuestamente fueron asesinaos los axentes escarecíen de buelgues dactilares de los acusaos. Amás, namás se practicó una prueba forense y nun se realizó nengún test d’ADN.
Por tou ello, la CSI, nel marcu de la campaña empecipiada pola Plataforma d’Acción Internacional polos Presos Políticos Saharauís de Gdeim Izik, dirixióse al Ministeriu d’Asuntos Esteriores pa esixi-y l’entamu d’una acción diplomática internacional pa la lliberación inmediata de tolos presos políticos saharagüis, la descolonización del Sahara y la formación de la República Árabe Democrática Saharagüi".

Breve historia d’un conflictu llargu

El territoriu del Sáhara Occidental puede atalantase anguaño como una nación ensin estáu. Históricamente fue formando parte de los diferentes reinos qu’ocuparon l’oeste del Magreb, hasta que en 1860 pasó a formar parte del reinu d’España pola ocupación militar española. Asina siguió hasta la muerte de Franco. Col xeneral moribundu, el monarca marroquí Hassan II fizo una xugada bien mañosa, y remanó una marcha de decenes de miles de marroquíes qu’ocuparon pacíficamente parte de la colonia española. Un apiteláu Exércitu español, col xefe del Estáu morriendo na cama d’un hospital y l’apertura d’un nuevu procesu políticu picando a les puertes, nun fizo otro que replegase y entregar la plaza al nuevu ocupante.
La fuerza política local, el socialista y panarabista Frente Polisariu, vio impotente cómo cambiaba la fuerza ocupante del so territoriu ensin que naide nun-yos preguntara nin rinxu.
Siguieron años de guerra abierta ente el Polisariu y l’Exércitu marroquí, con decenes de miles de muertos, episodios de guerra sucia, y una comunidá internacional que trataba con munches pallabres y pocos fechos, de mediar nel conflictu. El plan Baker ye la solución qu’aceptaron unos y otros pa facer callar les armes: un referéndum sobre l’autodetermín ente la población saharaui. La cuestión clave pasó entós a ser quién yera la población autóctona: dende l’añu 76 la corona alaui lleva llantando población de so, esóxena al Sáhara, y presionando pa retrasar el referéndum. Marruecos ye un aliáu estratéxicu de les potencies occidentales nel Magreb, y la ONU aceptó poles bones una retafila de retrasos na fecha del referéndum. Nun fai falta ser un analista abondo formáu pa decatase que la consulta tendrá llugar cuando los marroquíes tengan aseguraos sofitos abondo como pa que’l Sáhara Occidental siga perteneciendo a Marruecos.
L’Estáu español, parte con una evidente implicación directa, llavóse les manes dafechu na cuestión saharaui, dexando a la so antigua colonia a la so suerte frente al ocupante. Nin los gobiernos socialistes nin los populares quisieron enemistase col vecín del Sur.

La mocedá saharaui toma’l relevu na llucha

Lluéu de que callaren les armes, la iniciativa política pasó del Frente Polisariu, nel esiliu arxelín, a los mozos y moces que viven día a día nos territorios ocupaos por Marruecos. En 2010 la mocedá saharaui organizó unos campamentos de protesta en Agdaym Izik y nel Aiun, protestando contra la ocupación militar marroquí. Anque yera una acción pacífica, la irrupción del Exércitu y la Xendarmería marroquíes llevaron a episodios de másima violencia, nos que perdieron la vida trece alauies y diecinueve saharauies, anque les cifres son mui confuses.
De magar aquellos fechos un tribunal militar de Rabat xulgó a 24 activistes de los campamentos, condenando a la mayoría a penes de cadena perpetua.