11 conceyos asturianos ya aprobaron Mociones n’apoyu a la querella arxentina

3 de agostu de 2013 DE 2013 • Glayiu

Once conceyos asturianos yá aprobaron nos sos plenos una moción d’apoyu a la querella arxentina presentada en Buenos Aires por "xenocidiu y/o crímenes de lesa humanidá cometíos n’España pol franquismu y los sos autores ente’l 17 de xunetu de 1936 y el 15 de xunu de 1977".

Dende’l mes d’abril d’esti añu, un grupu de ciudadanos y ciudadanes constituyeron n’Asturies una plataforma que na actualidá forma parte de la Coordinadora Estatal d’Apoyu a la Querella Arxentina. El resultáu de los contactos establecíos nestos meses foi que 11 conceyos aprobaron nos sos plenos mociones d’apoyu a la querella: Avilés, Mieres, Llangréu, Ayer, Castripol, Riosa, Noreña, Morcín, El Franco, Samartín del Rei Aurelio y Corvera. Y esperen que s’aprueben nestos meses vinientes, ente otros, en L.lena, La Ribera, Llaviana, Grau, Bual y Carreño. Tamién recoyeron un bon númberu de firmes d’apoyu individual ente alcaldes y conceyales, amás de ciudadanos en xeneral y persones rellacionaes cola defensa de la Memoria Histórica.

La plataforma d’Asturies ta centrando’l so llabor en dar a conocer la iniciativa y posibilitar que les persones que sufrieron la represión y/o los familiares puedan utilizar esta vía pa esixir la verdá, xusticia y reparación.

El 18 de xunetu n’Uviéu, conxuntamente con Amnistía Internacional-Asturies, presentaron un informe "El tiempo pasa, la impunidad permanece", sobre les víctimes de la guerra civil y el franquismu, cola presencia del autor, Ignacio Jovits.

Depués del mes d’agostu vamos retomar l’actividá, estableciendo contactos con más conceyos y empezando una ronda d’entrevistes con tolos grupos parllamentarios de la Xunta Xeneral del Principáu, cola mira de que s’apruebe una Declaración Institucional apoyando la Querella contra los Crímenes del Franquismu.